प्यूठान । आरम्भ चौतारी लघुवित्त वित्तीय संस्था लिमिटेड प्यूठानले
आफ्ना सदस्यलाई पशुपालन सम्बन्धि तालिम प्रदान गरेको छ। आरम्भ चौतारी लघुवित्त वित्तीय संस्था बाग्दुला शाखाको आयोजनामा एक दिने आधारभूत तालिम प्रदान गरिएको हो ।

तालिममा प्यूठान नगरपालिकाको पशु सेवा शाखाका पशु डाक्टर विष्णु केसीले प्रशिक्षण दिनुभएको थियो । बाग्दुला शाखाअन्तर्गत रहेका ४५ वटा सक्रिय केन्द्रका सदस्य सहभागी थिए । प्रशिक्षक केसीले बाख्रा तथा भैंसी पालनका व्यवहारिक पक्ष सही खोर निर्माण, पोषण व्यवस्था, रोग पहिचान र उपचार, खोप तालिका तथा बजार व्यवस्थापन सम्बन्धी जानकारी दिनुभयो ।

तालिमको उद्घाटन गर्दै प्यूठान नगरपालिका वडा नम्बर ७ का वडा अध्यक्ष नेत्र बहादुर केसीले पशुपालन क्षेत्र ग्रामीण अर्थतन्त्रको आधारस्तम्भ भएकाले महिलाहरूले सीपयुक्त रूपमा पशुपालन अपनाएमा जीवनस्तर उकासिने बताउनुभयो ।

सुलिचौर स्टेशन म्यानेजर राजु कवरले जीवन बीमा, समूह मजबुती र पशुपालनबाट आयवृद्धिका सम्भावनाहरूबारे जानकारी दिनुभयो । कार्यक्रममा उत्कृष्ट केन्द्रहरूलाई सम्मान समेत गरिएको थियो ।

सम्मानित केन्द्रहरूमा सफल ०३६ चुजा, ०२५ बुकीडाँडा, ०३४ जुम्रीकाँडा, ०३७ खोलीगाउँ र ०२० चुन्दरी खोला रहेका छन । साथै विभिन्न विधाबाट ५ वटा केन्द्रलाई विशेष सम्मान प्रदान गरिएको थियो ।

कार्यक्रममा विशिष्ट अतिथि प्रहरी वरिष्ठ नायब निरीक्षक चन्द्रबहादुर घर्ति मगर, अतिथि समाजसेवी शिवबहादुर पाण्डे लगायतको उपस्थिति रहेको थियो । कार्यक्रमको सञ्चालन केशब कुमालले र स्वागत मन्तव्य शाखा प्रमुख प्रतिक्षा महराले राख्नुभएको थियो ।